یاشیل خیال
ژاک پره وردن بیر شعر
ژاک پره وردن بیر شعر تورکجه یه چئویرن: مقصود تقی زاده هریس(نیسگیل) بو سئوگی بو سئوگی بو قده ر برک بو سئوگی بو قده ر یومشاق بو سئوگی بو قده ر اینجه بو سئوگی بو قده ر قالین بو قده ر نایمید. بو سئوگی بو قده ر گؤزل گوندوز کیمی. زمانه نین پیس لی یینده، آغیرلیغیندا بو سئوگی بو قده ر پیس. بو سئوگی بو قده ر گئرچک بو سئوگی بو گؤزللیکده، بئله اوغورلو، بئله شاد بو سئوگی بو قده ر گولونج قارانلیقدان قورخان اوشاقلار کیمی تیتره ین، اسن. بو سئوگی بو قده ر اؤزونه باغلی گئجه نین قوینوندا آستاجا آددیملایان بیر کیشی تک ائهمال، دینج. بو سئوگی یادلاری قورخودان اونلاری دیله گتیره ن، دانیشدیران رنگ لرینی آتدیران. بو سئوگی بو قده ر اورکک- اونا تله قوران بیزیک- بو سئوگی بو قده ر یارالی، بو قده ر ازیلمیش بو قده ر اوزولموش بو قده ر توکنمیش بو قده ر اونودولموش - اونو یارالایان بیزیک اونو اوزه ن، اونو ازه ن توکه دن، اونودان بیزیک- بو سئوگی بو قده ر اجه ر، بو قده ر دیری گونش کیمی پاریلدایان سنین دیر و منیمدیر. هئچ زامان دییشیلمه ین بو سئوگی بیر بیتگی تک دوغرودور. بیر قوش کیمی چالیقلایان بیر یای کیمی ایستی دیر. بیز ایکیمیز کؤچوب قاییدا بیله ریک، اونودوب دا یوخلایا بیله ریک، اویانیب دا درد چکیب، قوجالا بیله ریک یئنی دن یوخلاییب اؤلوم یوخوسو دا گؤره بیله ریک. بیر ده اویانیب، بیر ده یوخلاییب بیر ده گولوب گنج لییه قاییدا بیله ریک. آنجاق سئوگیمیز قالار عینادکار و دوشونجه سیز بیری کیمی. ایستک لریمیز کیمی جانلی، دیری. خاطیره لر تک رحیمسیز حسرت کیمی دلی- دولو آغیرلامالار قده ر مهربان مرمر داشی کیمی سویوق گوندوز کیمی گؤزل، قشنگ اوشاقلار تک یومشاق، اینجه. باخیر بیزه گولومسه یه رک دانیشیر بیزله سس سیز- سمیرسیز. بیز اونو دینله ییریک ...
گوله- گوله/ترجمه شعر بدرود از مجموعه هوای تازه (احمد شاملو)
گوله- گوله ترجمه شعر بدرود از مجموعه هوای تازه (احمد شاملو) ایکی اورک گره کیر یاشاماقچون بیریسی سئومه یه، بیریسی سئویلمه یه بیریسی باغیشلاماغا، بیریسی آلماغا بیر اورک ؛ سؤیله مک اوچون، بیریسی جوابلاماقچون بیر اورک من اوچون، بیر اورک من ایسته دی ییم اینسان اوچون او اینسانی اؤز یانیمدا دویماق اوچون، دوشونمک اوچون. * گؤزونده کی دنیزلر دیبده قورومالی دیر من توکنمز بیر بولاق ایسته ییرم. ممه لرین نارین اولدوزلاردیلار اولدوزلاردان اویانا من بیر اینسان دیله ییرم: منی سئچه اونو سئچم اللریمه گؤز تیکه اللرینه گؤز تیکم، اؤز یانیمدا بیر اینسان دیله ییرم اینسانلارین اللرینه قوشا گؤز تیکمک اوچون اؤز یانیمدا بیر اینسان، اؤز یانیمدا بیر گوزگو او گوزگوده گولم بیر آغلایام بیر... * تانریلار قورتارانمادی منی سنله اینجه ایلگیمیز ده. منی قورتارا بیلمه دی نه سنله اینجه ایلگیمیز نه گؤزلرین، نه ممه لرین، نه اللرین اوره یین گوزگو دئییلدی اوره یین اینسان دئییلدی...
حسرت/رامیز روشن
حسرت رامیز روشن بیر تورپاق پارچاسی قاچار دالیمجا ائله بیل بویوما بیچیلیب منیم. قوپوب کندیمیزین آی ایشیغییلا قورباغا سسی دولو آخشاملاریندان. قوپوب ائولریندن آداملاریندان، بیر تورپاق پارچاسی قاچار دالیمجا. قاتاردا، ماشیندا اوره یی بولانان بنؤوشه منم، شه هره گلمه یه، منی گؤرمه یه کؤنلو قوبارلانان بنؤوشه منم. بیر پارچا تورپاغین دوشر دالینجا یویوره ر، یویوره ر چاتانماز آنجاق. بیر تورپاق پارچاسی آزار شه هرده منی آختارماقدان بئزر شه هرده. ایشیقلی رئکلاملار دئشر گؤزونو آغلاماق ایسته یر آغلایا بیلمز. آخیردا اؤزونو ساخلایا بیلمز، گئنیش کوچه لرین گوموش آسفالتینا آتار اؤزونو، ته کرلر آلتینا آتار اؤزونو... ...بیر تورپاق پارچاسی قاچار دالیمجا،- کاش گلیب تاپایدی بو گوندن منی. بو شه هر ایچینده آیری قویمایایدی اؤزوندن منی. گئجه لر او تورپاق پارچاسی اوسته بیر آغاج اکه یدیم، بیر ائو تیکه یدیم، گلین گتیره یدیم اؤز کندیمیزدن... قایناق:گؤی اوزو داش ساخلاماز، رامیز روشن، باکی،یازیچی،۱۹۸۷
قیسا شعرلر/مقصود تقی زاده هریس(نیسگیل)
قیسا شعرلر مقصود تقی زاده هریس(نیسگیل) *** کوچه ده اوشاقلارین گولوب- اویناماق سسی، کؤنلومده آغاج آتیمین توز بوروموش خاطیره سی... 27/4/1390 *** یوردوم، یوردوم یئتیم یوردوم! آی کده ری درین سئوینجی دایاز! حاییف اولسون کی سنه «وای! وای!» دئین چوخ اولدو «چؤرک» وئرن آز!!! یای- 1390، هریس *** زیروه لری دوشونورم دومان دولوب یاستیغیما... 8/8/1390- هریس *** گؤی ده یئرین سویوغوندان اوشویور. یاخاسینی اولدوز- اولدوز باغلاییب... 27/8/1390- هریس *** آدام کی داغا گئتمیر داغ آداما گلیر... 26/8/1390- هریس *** سنله اوتلادیغیم اوتلار آیریلیق قوخولویموش، سنسیزلییی گؤوشه ییرم... 27/8/1390- هریس *** بیر کوراوغلودان مین نعره قوپاردی ایندی مین نعره ده ن یاریم کوراوغلو قوپمور! *** اوره ییمده بیر کورسو قورمالی یام دویغولاریم اوشویور... *** هر یئری آغارتدی قار آه... اورکده کی قارالار... 4/9/1390- هریس *** قانادینی به لشدیرمه قارانلیغا، دورنالارلا گل اوچاق! قالساق، قارقا باشیمیزدان آشاجاق... 19/1/1391- هریس *** گونش کیمی خیالیمدا دوغورسان گؤزومده قارلار اریییر... *** سیرداشیمیش چوخدان بری اوره ییم له آتامین اللری... 1/2/1391- هریس *** اودوزدوم یولداشلاری یولوم بیتدی، داشیم قالدی. ائله بیر تک باشیم قالدی! 22/2/1391- هریس
آتا شعری«تقدیم اولور بابک اسلامی جنابلارینا»
آتا داغ چکدین سینه مه اوجا داغ بویدا سویکه نه جک بیرداغ ایدین سن آتا بیلیرسن می ؟ نئجه سن سیزلمیشم نئجه کئچه جک دی سنسیز گون آتا ! تئز یاتیرام سن یوخوما گله سن ال لرونان گوز یاشیمی سیله سن من گولنده سنده منله گوله سن خاطیره لر اولمویایدی سون آتا نیلییم کی ال لریمیز اوزولدی شمع باشینا پروانه لر دوزولدی گوزیاشلاری گوزلریمدن سوزولدی آخیر اورگیمدن سئل تک قان آتا داریخیرام سنی گوره بیلمیرم کیم سه دن عنوانین سورا بیلمیرم آیریلیق دان چتین یارا بیلمیرم ائشیدنین گوزلری گریان آتا بوگون شهریاردی همدمین سنین آغریداجاق اولکه نی غمین سنین آیدین اولار یقین مبهمین سنین یاسه باتیب اولی ساوالان آتا گئجه گئتدی گوندوز لره قوشولدون سای حساب سیز سن یوزلره قوشولدون قطره ایدین دنیز لره قوشولدون کوکره یه جک آراز کیمین خان آتا سنده حمید بیردوستی بیر میلت سان ائله دایاق اولار شاعر هرزامان اونودولماز باریز کیمین بیر انسان ائل دایاغی ، یاسلی ساوالان آتا
حسین منزوی -نین "دومان" اثری
حسین منزوی "دومان"دا ۱۳۷۲ دن ۱۳۸۴ جو ایللرده بو عنوان آلتیندا، بیر ئچه مقاله ده حسین منزوی نین تورکجه شعرلرینی آراشدیریب تانیتدیرمیشدیم. بیلدیگینیز کیمی، حسین منزوی، زنگانلی شاعیر اولاراق چاغداش فارس شعری نین زیروه سینده دایانین و غزل ژانری نین بؤیوک اوستادی و یئنی لیک لر یارادانی دیر. فارس شعرینده اونون دیه رلی ائتکیسی دانیلمازدیر. دوغروسو بودور کی منزوی، بیر ندچه چاغداش شاعیرله برابر فارس غزلینده بیر زیروه یاراتمیشلار، آنجاق بوتون فارس شاعیرلری اونون یارادیجیلیق باشاری سینی اینانیب و اونا حؤرمت بسله میشلر. نه یازیق کی منزوی نین تورکجه شعر دفتری – "دومان" اؤز حیاتیندا ایشیق اوزو گؤرمه دی. بو شعر دفتری نی بلکه ده بو سطیرلرین یازاری هامیدان چوخ آراشدیرمیش و شاعیر دونیاسینی دگیشندن سونرا دا بیر نئچه مقاله ایله اونون عزیزله مه سینده چالیشمیشام. منزوی، "امید زنجان" هفته لیگی چیخان زماندا – 1372 جی ایلده، "امید در امید" عنوانی آلتیندا بو هفته لیکده بیر ادبی فارسجا شعر صفحه سینی دولاندیریردی. همان زماندا، من ده "یاشیل خیال" عنوانیندا تورک صفحه لری نین دولاندیرانی کیمی چالیشیردیم. همان چاغلاردا ادبی بحث لر اولموش و بو بحث لر سونرالارا قده ر اوزانمیشدیر. بیلدیگینیز کیمی، زنگاندا تورک ادبیاتی گنجلر طرفیندن آلقیشلانیب و آنا دیلینده ماراق گؤسترمه گونو – گوندن چوخالیردی. منزوی ده "دومان" اثرینی چاپ اوچون حاضیرلاییردی. همان زمان دومانی منه وئره رک یاردیم ایسته میش و من ده الیمدن گله نی اسیرگه مه دیم. بورادا بیر یانلیش گئدیردی: او، بئله اینانیردی کی من گنج اوستونده اوتورموشام و چاپ اوچون منده سرمایه واردیر. آنجاق بئله اولمادیغینی گؤروب، داها مندن باشقا انتظاری اولا بیلمزدی. بئله لیکله دومان کتابی چاپ اولمادی و بوگونه قده ر ده چاپ اولماییبدیر. آمما، بونا باخمایاراق، 20 – 30 شعرینی مختلف درگیلرده چاپ ائتدیرمیشم. اؤزومه بورج بیلیرم اونون تورکجه شعر دفتری – دومان ا دؤنوب تانیتدیرماغینا یئنه ده اوز گتیرم. منزوی، گنج چاغلاریندان فارسجا شعر یازدیغی زمانلار، آنادیلیندن غافیل اولمامیش و هردن بیر، گؤزه ل غزللر تورکجه یازمیشدیر. منزوی، آذربایجان ادبیاتی ساحه سینده "حیدربابایا سلام" اثریندن چوخلو تاثیر آلاراق، اونو فارسجایا دا چئویرمیش، الحق دئمک اولار "حیدربابا"نین فارسجا چئویرمه لر آراسیندا، ان گؤزه لی و سربست ترجمه سی منزوی یه باغلی دیر. بو چئویری، مستقل بیر کتاب کیمی چاپ اولموشدور. بوندان علاوه، اوستاد شهریارا اولان محبتی نی "این ترک پارسی گوی" کتابیندا گیزلتمه میش و شخریار حاققیندا ان ...